28

اسمارٹ فون استعمال کرنے والے بچوں کا بچپن ختم ہورہا ہے، تحقیق

امریکی ماہرین نے اسمارٹ فون استعمال کرنے والے بچوں کے والدین کو متنبہ کیا ہے کہ جدید ٹیکنالوجی کی وجہ سے چھوٹے بچوں کا بچپن وقت سے پہلے ختم ہورہا ہے۔

تفصیلات کے مطابق امریکا میں ہونے والے ایک سروے کے دوران یہ انکشاف ہوا کہ ٹیکنالوجی اور اسمارٹ فون کا بڑھتا ہوا استعمال بچوں کو روز مرہ کے معمولات سے بہت دور کررہا ہے۔

ماہرین کے مطابق اسمارٹ فون کو اہمیت دینے والے بچے اپنے کھیل کود، وقت پر کھانے اور اہل خانہ کے ساتھ بیٹھ کر بات چیت کرنے سے دور ہورہے ہیں جس کے باعث اُن کی حقیقی زندگی بری طریقے سے متاثر ہورہی ہے۔

مزید پڑھیں: اسمارٹ فون نوجوانوں‌ اور بچوں‌ میں‌ بیماریاں‌ پھیلانے کا سبب، تحقیق
تحقیقاتی ماہرین کے مطابق 72 فیصد دس سال سے کم عمر بچے اور بچیاں یہ سمجھتے ہیں کہ انہیں فون پر آنے والے پیغام کا جواب ضرور دینا ہے جبکہ 59 فیصد والدین کا مانناہے کہ اُن کے بچے اسمارٹ فون استعمال کرنے کی بری لت میں مبتلا ہوگئے۔

ماہرین کا کہنا تھاکہ اسمارٹ فون اور ٹیبلیٹ کا تیزی سے بڑھتا ہوا استعمال نو عمر بچوں کے مزاج کو غیر فطری بنا رہا ہے جس کے باعث انہیں اپنے گھر کے ماحول اور بچپن کی شرارتوں یا معصومیت کا کوئی احساس تک نہیں۔

تحقیق میں یہ بات بھی سامنے آئی کہ اسمارٹ فون پر ویڈیوز دیکھنے یا پھر گیم کھیلنے کا رجحان بچوں میں تیزی کے ساتھ شدت اختیار کررہا ہے صرف امریکا کی بات کی جائے تو 10 فیصد سے زائد بچے اس بری لت کا شکار ہوچکے۔

یہ بھی پڑھیں: اسمارٹ فون میں گم رہنے والے والدین اولاد کی ذہنی نشوونما کو شدید متاثر کرتے ہیں
سروے کے مطابق آئندہ آنے والی نسل اسمارٹ فون کی وجہ سے سست ہوگی جس کے بہت برے اثرات اُن کی زندگیوں پر پڑیں گے کیونکہ ایک ایسی نسل حالیہ دور میں پروان چڑھ رہی ہے جو گھروں سے باہر جانے، کھیل کود، جسمانی ورزش سے بہت دور ہے۔

اس خبر پر اپنی رائے کا اظہار کریں

اپنا تبصرہ بھیجیں

This site uses Akismet to reduce spam. Learn how your comment data is processed.